Chumm mit i Schnee „Papa, es schneit!“ D Lena luegt zum Fänschter us. Ändlech schneits. „Weisch, wi lang i da druf ha gwartet!“ Geng meh u meh Flocke chöme drhär. So schöni Flocke... wi Fäderli? „Wi Naselümpe“, meint dr Papa. Er luegt ufe Biudschirm vo sim Läptop, scho dr ganz Morge. „Chunsch mit mir use?“ fragt d Lena. „Lueg, sisch scho aus wiiss: d Büsch si wiiss u d Böim si wiiss, dr Briefchaschte het es wiisses Dächli u d Zuunpföschte hei wiissi Hüetli u dr Huet vom Herr Schneebärger het es wiisses Bärgli obedruf!“ „Tuet mr leid, Lena, abr itz hani ke Zit, i bi im hinderlig. I mues dä Pricht umbedingt no schnäu fertig mache, süsch verliereni dr Fade. U itz loufts mr grad wi am Schnüerli... Schpeter chumeni gärn. Frag doch afe öper vo dine Fründe zum mit usecho.“weiterlesen